🔵تمرين الرجل🔵

🔵تمرين الرجل🔵

النهاردة هتكلم عن تمرين بحبه جدا و هو تمرين الرجل
معظم المبتدئين بيفكسوا تمرين الرجل..يعنى يتمرن مثلا صدر ضهر كتف دراع و يعيد

و دة من اكبر الغلطات اللى حد ممكن يعملها فى حياته..ليه؟ عشان اكتر من سبب

🔘مش هيكون عندك اى توازن فى الشكل بين عضلاتك العلوية و السفلية..هتبقى من فوق كبير و من تحت صغير و ضعيف و دة الظاهرة المعروفة ب chicken leg او رجلين الفرخة..تخيل يتقال عليك خازم رجل الفرخة مثلا ..عيب يعنى

🔘كتلة العضلات من فوق هتكون اتقل من تحت..و دة هيعمل نوع من عدم التوازن العام يعنى مش هتبقى ثابت و ملخلخ من تحت..عيب تبقى ملخلخ من تحت

🔘الناس بتفوت تمرين الرجل اعتقادا منهم انهم اولى يركزوا على العضلات اللى فوق عشان تكبر..بس دة مش بيحصل..عشان تمرين الرجل و بالذات التمارين المركبة زى الsquat و dead lift من التمارين اللى بتحط الجسم و العضلات تحت ضغط عالى و بتجبر الجسم يفرز هرمون التستوستيرون و هرمون النمو بنسب اكبر..و دة اللى هيعود فى النهاية عليك بزيادة شاملة فى عضلاتك كلها و هيحسن اداءك و تمرينك

🔘الرجلين ثبات و قوة و ثقة فى النفس عالية..فايتك كتير لو مش بتتمرن رجل

🔴نيجى بقى لكام نقطة اساسية فى تمرين الرجل

🔘لو الرجل عندك ضعيفة مرنها مرتين فى الاسبوع..يوم قسمها مع عضلتين و يوم لوحدها

🔘تمرين الرجل عاوز غباوة..مش بالعقل خالص..و كلامى مش معناه تجيب لنفسك اصابة..لا تاخد بالك من الحركات الغلط و تأمن نفسك كويس..بس كلامى معناه مينفعش يوم الرجلين تروح و انت مرتاح..لا لازم تجيب اخرك و تروح بتحبى على ايدك و رجليك او صحابك شايلينك..هى دى تمرينك الرجلين التمام

🔘لو عاوز ضخامة فى رجليك و لازم تكبرها..يبقى تركز على ال٣ تمارين دول
⬅️الsquat الحر بكل انواعه العادى الواسع و ال١١ و السومو..العبه بأوزان عالية و عالية يعنى عالية ..جو الطارتين العشرين فى كل جنب دة مش هينفع..حط يابنى شوية كويسين

⬅️الdead lift ايوة الdead lift و الله ..التمرين دة مش ضهر بس زى ما الناس فاكرة..التمرين دة اساسا تمرين رجل تركيزك فيه بشكل كبير معتمد على الرجلين الامامية و الخلفية و بعدين الضهر بيشتغل فى الجزء الاخير من التمرين

⬅️الleg press او المكبس..غباء السنين بقى فى الاوزان..لم طارات الجيم كلها و حطها..جيب اخرك..لازم ترفع وزن عالى برجليك..دة بنسبة كبيرة مع تمرين squat اللى بيعمل عضلات الكوادز الامامية

ال٣ تمارين دول تمارين اوزان عالية ماينفعش تتمرنها بوزن خفيف

🔘فى تمارين تانية عاوزة تركيز و عدات اكتر
⬅️زى ال lunges او الطعن العبه بدامبلز خفيفة او بار فيه وزن معقول و ركز على الاداء الصح و العبه بهدوء..
⬅️تمرين ال leg extension اللى هو الرفرفة على الجهاز..التمرين دة من اكتر التمارين اللى بتسبب اصابات فى الركبة و الصابونة..العبه بدون اوزان عالية..اوزان متوسطة مقاومتها معقولة على رجليك..العبه بهدوء و اثبت فوق فى وضع ال extension ثانية واحدة و انت نازل انزل بهدوء
⬅️تمرين ال leg curl للخلفيات او الهامسترينج العبه و انت نايم بتركيز و اوزان معقولة و عدات اكتر كأنك بتلعب بايسبس-الهامسترينج فى الرجل بيوازى البايسيبس فى الدراع تشريحيا- ركز و اعمل ثبات فى العضلة و انت عاملها انقباض و انزل بهدوء...و ممكن تلعبه و انت واقف بس حط وزن خفيف عشان الاصابات

🔴فيه كام حاجة تانيين تاخد بالك منهم
🔘قبل تمرين الرجلين سخن كويس..و سخن كويس مش معناها تجرى على المشاية..سخن كويس يعنى سخن تمارين لرجليك بدون اوزان كدة بس حس برجليك بتسخن عشان تجرى الدم فيها و تهيأ مفاصلك و اوتارك للمدعكة اللى جاية بعد كدة..سخن عضلات رجلك الخارجية abductor و الداخلية adductor عشان تتجنب خطر الاصابات

🔘سخن القطنية خفيف كدة عشان عضلة القطنية عضلة مساعدة فى معظم تمارين الرجل و بالذات الsquat مش هتقدر تشيل وزن فيه و عضلة القطنية ضعيفة عندك..سخنها كويس..البس حزام للأمان..استخدم اربطة لركبك لو هتشيل وزن تقيل

🔘لو عندك ضعف فى رجل عن رجل سواء رجل اصغر من رجل او فيه عدم اتزان عندك..العب فردى..يعنى رجل و رجل عشان تعمل تقدم عضلى متوازن بين الرجلين..زى تمرين الطعن..او المكبس برجل واحدة

🔘لما تحب تنشف الرجلين و تنزل الدهون اللى عليها ركز على السوبر سيت..و لما بقول سوبرسيت للرجلين دى مش كلمة سهلة دى عذاب بمعنى الكلمة..ربنا معاك انا متابعك و بشجعك
فى التنشيف برضو ركز على التمارين اللى بتعمل عزل لعضلات الرجلين..leg extension و leg curl اتمرنهم عدد تكرارات كبير

‏🔴🔴🔴 Calves او السمانة بالعربى..خليتها لوحدها كدة عشان ناس كتير سألتنى عليها
السمانة عضلة صغيرة..مش عاوزة وزن عالى قد ماهى عاوزة تركيز و عدد تكرارات اكبر..السمانة استشفاءها سريع..ممكن تلعبها مرتين فى الاسبوع..يوم لوحدها مع عضلات تانية و يوم مع الرجل كلها..ركز انك تعد ١٢:١٥ و ممكن ٢٠ تكرار
ليها ٣ زوايا ١١ عادى بتشغل السمانة بشكل عام..٧ بتشغل الفص الداخلى للسمانة..٨ بتشغل الفص الخارجى للسمانة..حاول تنوع بينهم و شوف انت رجلك محتاجة ايه و ركز عليها
السمانة ليها تمارين كتير منها اللى واقف و منعها اللى قاعد على جهاز..الواقف بتشغل الفصين الكبار بتوع السمانة و العضلة المدفونة وراهم..و انت قاعد بتشغل العضلة المدفونة دى بنسبة كبيرة اكتر من الفصين الكبار..نوع بين اشكال التمرين بس ركز على الواقف اكتر

🔴الكلام دة خلاصة خبرة سنين فى التمرين..و دراسة و قراية كتير..و بيتكتب بعناية و هدوء و مراجعة للمعلومات..واظن المجهود اللى بعمله ده مايستاهلش ان حد يسرقة و ينسبه لنفسه..ماتسرقوش من ورايا و تاخده عندك بإسمك و كأن مفيش حاجة حصلت..لو محتاج تاخده ضرورى قولى و انا اديهولك..قصدى خده بس انسب الكلام لصاحبه او اعمله شير

تمام كدة على الرجل.

نتقابل المرة الجاية فى المكملات بقى..سلام⬛️
CP.. Cap Mohamed ElQadi